5 خطوات بسيطة لشرح طريقة عمل اعلان ممول على الانستجرام

5 خطوات بسيطة لشرح طريقة عمل اعلان ممول على الانستجرام

منصات التواصل الإجتماعي بقت شيء أساسي ومهم جدًا في حياتنا اليومية. ودة لأننا بنقدر نعرف أخبار أصحابنا وأخبار العالم من خلال المنصات دي وكمان بنقدر نشاركهم آرائنا، أفكارنا، إهتماماتنا، وأخبارنا وبنقدر نلعب ونسلي وقتنا من عليها أو حتى نتفرج على فيديوهات في مجالات مختلفة. وبسبب كدة زاد جدًا عدد مستخدمين منصات التواصل الإجتماعي والوقت اللي بيقضوه على المواقع دي وبالتالي زادت رغبة الشركات إنهم يعلنوا ويسوقوا لمنتجاتهم على المنصات دي طالما إن التليفزيون والجرايد والمجلات مبقتش مستخدمة زي زمان. ومن هنا ظهرت قوة التسويق الإلكتروني بأشكاله المختلفة ولكن خلونا النهاردة نتكلم عن شكل واحد من أشكال التسويق الإلكتروني وهو التسويق على إنستجرام وهنقولك إزاي تزود عدد المتابعين على إنستجرام وكيفية عمل إعلان ممول على إنستجرام.

إيه هو إنستجرام؟

قبل ما تعرف إزاي تسوق على منصات السوشيال ميديا المختلفة خلينا نعرف الأول إيه هو إنستجرام؟ ببساطة إنستجرام هو منصة تواصل اجتماعي معتمدة على المحتوى المرئي لأن هدفها هو مشاركة اللحظات الحلوة مع أصحابنا والإحتفاظ بيها ودة بيكون عن طريق إنك تنزلها في بوست أو تنزلها كا قصة أو ستوري لمدة 24 ساعة بس ودي بتكون للأحداث الأقل أهمية بالنسبالك. ولكن مهم تعرف إن في تقريبًا 2 مليار شخص في العالم بيستخدموا إنستجرام ودة بردو دفع الشركات إنهم يسوقوا لنفسهم من خلاله خصوصًا الشركات اللي بتقدم منتجات لأنهم بيقدروا ببساطة يصوروا المنتجات دي ويعرضوها للناس على منصة خاصة بالصور.

ليه اعمل اعلان ممول على إنستجرام:

زي ما قولنا إن عدد مستخدمين إنستجرام وصل تقريبًا 2 مليار ودة خلى إنستجرام يثبت نفسه بقوة كمنصة قوية جدًا للتواصل الإجتماعي وبسبب نوعية جمهوره اللي بيكون أصغر سنًا وأكتر تفاعل بيكون التسويق عليه مفيد أكتر بكتير من غيره من المنصات. ولكن حجم الجمهور مش هو الفايدة الوحيدة اللي تخليك تعمل اعلان ممول على إنستجرام ولكن في أسباب كتيرة تخليك تختار إنستجرام كمنصتك الإعلانية ودول أهمهم:

• إنشاء سلس للحملات الإعلانية:

بسبب ترابط إنستجرام وفيسبوك من خلال Meta، عمل إعلان ممول على انستجرام بقى سهل جدًا خاصًة لو إنت بتعرف تعمل إعلانات لفيسبوك لأن كل اللي هتحتاج تغيره هو المنصة اللى هيظهر عليها الإعلان. دة غير إن ممكن ربط إنستجرام بـ shopify عشان يسهل على الجمهور عملية التسوق اونلاين ودة هينفع جدًا لو كنت بتروج لمنتجات مش خدمات.

• زيادة وعي الجمهور بالبيزنس بتاعك:

بسبب كبر حجم مستخدمين انستجرام واللي بيوصل لـ 2 مليار مستخدم كل واحد فيهم بيزور على الأقل حساب بيزنس واحد بس في يومه، يعتبر انستجرام منصة عظيمة للتسويق الالكتروني وعمل إعلان ممول وكمان دة هيخليك تقدر بسهولة تزود عدد المتابعين على إنستجرام وبالتالي تزود وعي الناس بيك وتبدأ ناس أكتر تعرفك.

• منصة صديقة للإبداع:

بسبب إن إنستجرام في الأصل هو منصة لنشر الصور، فهو من أكتر منصات التواصل الإجتماعي اللي بتشجع الإبداع والمبدعين ودة لأن كل ما كان الصورة أو الفيديو اللي هتستخدمهم أحسن وفيهم إبداع كل ما كانت نتائج الإعلانات أفضل وأقل في التكلفة.

• نسبة تفاعل أعلى:

رغم إن عدد مستخدمي الفيسبوك أكتر ولكن مستخدمين إنستجرام بيميلوا دايمًا للتفاعل أكتر ودة لكذا سبب منهم متوسط أعمار المستخدمين دي والخصوصية وعدد الساعات اللي بيقضيها المستخدمين على كل منصة منهم.

• عائد ربح أكتر:

تقارير كتير أثبتت معدل النقرات على إنستجرام أو الـ CTR واللي وصل لـ 0.58% ودة معناه إن جمهور إنستجرام بياخد خطوة وبيدوس على الإعلانات أكتر ودة سبب يخليك تفكر بجدية في إنك تعمل إعلان ممول على إنستجرام لأن كل ما كانت النقرات أكتر بنفس السعر هيكون طبعًا عائد الربح أكتر من أي منصة تانية.

كيفية عمل اعلان ممول على إنستجرام:

في أكتر من طريقة لعمل إعلان ممول على انستجرام ولكن أسهلهم هي عمل إعلان من على الـ Ads manager أو مدير الإعلانات الخاص بـ Meta من خلال 5 خطوات بسيطة هنعرفك طريقة عمل اعلان ممول على انستجرام:

1. اعمل حساب بزنس:

أول خطوة هتحتاجها هي إن يكون عندك حساب على الـ business manager ودة عن طريق إنك بتدخل على فيسبوك بيزنس من اللينك دة https://business.facebook.com/overview وتختار إنشاء حساب جديد وكل اللي بتحتاجه هو انك تدخل إسمك والإيميل الخاص بشغلك وهيكون الحساب اتعمل وإنضم تحته أي صفحة إنت بتملكها أو Admin فيها.

1. أربط الحساب البيزنس بإنستجرام:

بعد ما عملت حساب بزنس هتحتاج تربطه بحساب إنستجرام ودة من خلال الـ business manager هتفتحه وتدوس على حسابات انستجرام وبعدها "إضافة حساب" وهنا كل اللي هتعمله هو انك تدخل إسم المستخدم الخاص بإنستجرام وكلمة المرور الخاصة به.

1. انشاء حملة:

بعد ما ربطت حساب انستجرام بحسابك الزنس، تقدر تفتح مدير الإعلانات أو المعروف بـ Meta ads manager وتختار الصفحة اللي عايز تعملها إعلان دة في حالة انك بتدير أكتر من صفحة. وبعدها هتدوس على إنشاء حملة جديدة وهتبدأ تختار إسم للحملة وللإعلان وتختار التكلفة والفترة الزمنية والهدف من الحملة ودة هنعرف بالتفصيل كمان شوية.

1. الإستهداف:

تعتبر أهم خطوة في عمل إعلان ممول على إنستجرام لأن الإستهداف الصح هو اللي بيفرق مسوق عن التاني في الشطارة وهو اللي بيقدر يجيبلك أحسن نتائج بأقل تكلفة. في الإستهداف بتختار كل حاجة عايزها تكون موجودة في عملاؤك فا بتختار سنهم، جنسهم، موقعهم الجغرافي، إهتماماتهم وكمان تقدر تختار وظايف معينة وحاجات تانية كتير حسب المنتج بتاعك مناسب لمين. وعشان تعرف تعمل إستهداف مظبوط لازم تكون حاطط في دماغك buyer persona أو شخصية مشتري خيالية ودة في أدوات كتير بتساعدك فيه أو تقدر تعملها لوحدك لو فاهم عملائك ومنتجاتك كويس.

1. النشر والمتابعة:

بعد تحديد الجمهور والتكلفة ووقت تشغيل الاعلان الممول بتختار المنصة اللي عايز تنشر عليها اعلانك سواء كانت انستجرام بس او عايز تعمل نفس الإعلان على الفيسبوك كمان وبتنشر الحملة. هنا محتاج تعرف إن الحملة بتقعد في المراجعة تقريبًا 24 ساعة ولكن في أغلب الأوقات بتشتغل بعد 5 أو 6 ساعات وممكن أقل. وبردو لازم تعرف إنك عشان تقدر تحكم على إعلان ممول محتاج تشوف النتايح بعد 5 أيام لأن أول كام يوم بيكون لسة الإعلان بيظر لمجموع مختلفة وفي أوقات مختلفة عشان يقدرر يحدد اللي بيجيب أحسن نتائج ويكمل بيها ودة يفسرلك إن التكلفة ممكن تكون عالية أوي أول يومين ولكن مع الوقت بتبدأ تنزل والنتائج بتكون أفضل.

عمل اعلان ممول على انستجرام من داخل انستجرام:

لو مش حابب تستخدم الطريقة الأولى ومش حابب تربط حساب إنستجرام بالحساب البزنس الخاص بيك تقدر تعمل إعلان ممول على إنستجرام من داخل إنستجرام نفسه. ولكن انستجرام مش زي الفيسبوك في تحديد الأهداف أو الـ objectives الخاصة بالإعلان. ودة لأن اعلانات انستجرام الممولة بيكون ليها 3 أنواع من الأهداف؛ الأول هو زيارات لموقعك والنوع التاني هو رسائل سواء كانت عن طريق الواتساب أو رسائل على الأكونت، أما النوع التالت فا هو الإنتشار أو زي ما بنسميه في فيسبوك Reach وهنتكلم بالتفصيل أكتر عن كل هدف من دول في السطور الجاية.

اعلان انستجرام ممول هدفه الرسائل:

لو انت بتسوق لمنتج أ, خدمة معينة في أوقات كتير هتحتاج إن الناس المهتمين بيها يدخلوا يبعتولك رسالة يسألوك عن التفاصيل أو عشان يطلبوها على طول وعشان كدة النوع دة من الاعلانات بيتيح لهم زر Send message واللي بيقدروا يبعتوا رسالة بسهولة بمجرد الضغط عليه. والرسائل هنا بتكون نوعين انت بتقدر تختار منهم؛ أول نوع وهو إنهم يبعتولك رسالة على حساب انستجرام نفسه أو النوع التاني وهو إن بمجرد الضغط على زر send message بيتحول العميل تلقائي للواتساب والشات بتاعك عشان يقدر يبعتلك استفساره. ودة بيرجع ليك هل انت محتاج ان الرسائل تكون على انستجرام لو معاك فريق من أكتر من شخص بيردوا على الرسائل فا محتاج إنها تتبعت من خلال مكان كلهم قادرين يوصلوله أو إنها تكون من خلال الواتساب لو في شخص واحد بيرد وحابب ان وصوله للرسائل يكون أسهل وأسرع ومتاح طول الوقت.

زيادة الزيارات لموقعك:

لو شركتك أو البيزنس بتاعك له موقع الكتروني فا غالبًا بتحتاج إن الناس تدخل على الموقع بشكل متكرر لأن الدخول على الموقع هيزود فرصة إنهم يختاروا أكتر من منتج مش بس انهم يختاروا المنتج اللي معروض في الاعلان. دة غير ان زيادة عدد الزيارات على موقعك بتحسن من أداء محركات البحث الخاصة بموقعك واللي اتكلمنا عنه بالتفصيل في المقال اللي فات وتقدر ترجعله من هنا.

زيادة الزيارات لصفحتك:

أكيد سمعت كتير عن إعلان هدفه reach من غير ما تكون فاهم أوي إيه هو الهدف دة وإيه أهميته. الـ reach بإختصار هو الإنتشار أو ان اعلانك يشوفه عدد أكبر من الناس وتقدر بمحتوى مختلف وجذاب تخليهم مهتمين فا يعملولك فولو وكمان يبعتولك رسائل. والنوع دة من الأهداف بيكون مهم جدًا في مرحلة الإنتشار أو أول مرحلة من مراحل رحلة المُشتري واللي بيكون هدفك فيها الوصول لأكبر عدد من الناس المهتمين بمجالك لأن في المرحلة دي هدفك الأساسي بيكون نشر الوعي والمعلومات عنك من غير الإعتماد على المبيعات بشكل قوي لأن ببساطة إنت محتاج تعمل قاعدة قوية تخلي المستخدمين يثقوا فيك عشان يقدروا بعد كدة ياخدوا قرار الشراء منك.

نصائح لعمل إعلان ممول على إنستجرام:

ناس كتير بتسأل "إزاي أزود عدد المتابعين على إنستجرام؟" وعشان كدة وبعد ما عرفنا طريقة عمل إعلان ممول على إنستجرام وأهداف الإعلان هنقولكم شوية نصايح عشان إعلانكم يكون جذاب أكتر ويحقق نتائج أحسن بتكلفة أقل.

• أستخدم فيديوهات
• إعمل مقدمة الفيديو جذابة وقوية
• إعمل إعلان بيحتوي على أكتر من صورة أولهم تكون بتحتوي على الـ Call to action أو سؤال من أكتر الأسئلة اللي بيسألها عملاؤك.
• إستخدم الـ influencer marketing أو التسويق عبر المؤثرين والمشاهير.
• جرب أكتر من ديزاين لنفس الإعلان وأكتر من إستهداف لنفس الصورة عشان تقدر تحدد أحسن محتوى وأحسن إستهداف.
• قسم ميزانيتك على أكتر من إعلان ليهم نفس الهدف.
  

بكدة إنت عرفت أهم خطوات لكيفية عمل إعلان ممول على إنستجرام وتقدر ببساطة تعمله بنفسك مع شوية ممارسة وهتقدر تفهم أكتر وتحقق نتائج مرضية ليك.