3 طرق مضمونة لـ تحسين محركات البحث لموقعك على الويب

3 طرق مضمونة لـ تحسين محركات البحث لموقعك على الويب

أصحاب شركات كتير بيعتقدوا إن الظهور في النتائج الأولى لمحركات البحث حاجة عادية بتحصل تلقائي ومش محتاجة شغل ودراسة كتير وبيرجعوا بعد فترة يسألوا، احنا عندنا ويبسايت أهو ليه بقى مش بنطلع في النتائج الأولية؟

الرد على السؤال دة مش هيكون من كلمتين لأنه محتاج إنك تفهم حاجات كتير أوي الأول زي يعني إيه أصلًا محركات بحث وإيه هي طرق تحسين محركات البحث لموقعك على الويب ويعني إيه خدمة تحسين محركات البحث. في المقال دة هنعرفك على محركات البحث، إزاي بيشتغل، ايه هي طرق تحسين مستوى البحث لموقعك على الويب.

يعني إيه محرك بحث؟

أقرب مثال تقدر تفهم به معنى محرك البحث هو دليل التليفونات، كتاب كبير متجمع فيه كل البيانات عشان تقدر توصل للحاجة اللي بتدور عليها بسهولة. الفرق إنه بيكون الكتروني وبشكل أكبر شوية لأنه مش مخصص لفئة معينة زي دليل التليفونات.

ببساطة مًحرك البحث هو برنامج إلكتروني بيشتغل بالإنترنت بيكون متسجل عليه بيانات مليارات المواقع الالكترونية عشان تقدر تكتب كلمة أو جملة ويطلعلك أكتر نتائج مناسبة ليها. ودلوقتي في أكتر من محرك بحث مشهور وأشهرهم هو Google واللي بنستخدمه كلنا عشرات المرات في يومنا ولكنه بالتأكيد مش الوحيد، فيه محركات بحث تانية زي Yahoo و Bing وغيرهم كتير. ودة اللي بياخدنا للسؤال التاني؛ مع وجود مليارات المواقع على الإنترنت، ايه اللي بيخلي موقع يطلع رقم واحد وموقع يطلع رقم 10؟

عشان تقدر محركات البحث تقرر أنهي موقع هيطلع رقم واحد بتحط شوية مقاييس تقيس بيها جودة الموقع زي المحتوى المكتوب، المحتوى المرئي، القيمة العلمية في المحتوى، وحاجات تانية كتير هنعرفها كمان شوية. ولكن عشان تقدر تكون دايمًا في النتائج الأولية بتحتاج لحاجة إسمها خدمة تحسين محركات البحث أو search engine optimization. ودة عن طريق شوية حاجات بتدرسها وتطبقها عشان تحسن أداء محركات البحث وتخليها تلتفت لموقعك الالكتروني.

طرق تحسين محركات البحث لموقعك على الويب:

زي ما اتفقنا إن تحسين محركات البحث حاجة محتاجة لدراسة وتطبيق ولكن خلينا نعرف ايه هي طرق تحسين محركات البحث لموقعك على الويب. أولًا لازم تاخد بالك من المحتوى سواء كان المرئي أو المكتوب، ثانيًا تصميم الموقع، وثالثًا استخدام كلمات مفتاحية قوية بطريقة مظبوطة. في السطور الجاية هنعرفك طرق تحسين محركات البحث لموقعك على الويب من خلال ال3 عناصر دول.

تحسين جودة المحتوى:

أول وأهم خطوة في تحسين محركات البحث لموقعك على الويب هي المحتوى.

المحتوى المكتوب لازم يكون منظم ويكون مكتوب بطريقة تشويقية تقدر تجذب انتباه المستخدم. لازم في كتابة المحتوى الخاص بموقعك تراعي إنه يكون مناسب ومتماشي مع طبيعة عميلك. يعني متقدرش تكون بتستهدف أجانب وتكتب كل كلامك عربي لأنه مش متماشي مع طبيعتهم. وطبيعة العميل بتكون من حيث اللغة، الفئة العمرية، الطبقة الاجتماعية، اهتمامته، وحاجات تانية كتير لازم تراعيها في المحتوى المكتوب.

تاني حاجة محتاج تراعيها في المحتوى هو إنه يكون بيقدم معلومة حقيقية وقيمة للمستخدم لأن دة بيدخل في عملية التقييم اللي بتعملها محركات البحث.

أما المحتوى المرئي فا هو خطوة مهمة جدًا، ناس كتير بتفتكر إن المقالة ممكن تكون محتوى مكتوب فقط ولكن الحقيقة إن محركات البحث بتهتم جدًا بوجود محتوى مرئي معبر وملائم ومتماشي مع المحتوى المكتوب غير إن كل الصور المستخدمة لازم تكون بجودة عالية جدًا.

تصميم موقع سلس ومفهوم

المستخدم وهو داخل موقعك يدور على معلومة معينة مش هيحب ابدًا انه يكون داخل متاهة مش عارف يدوس فين أو يعمل إيه. عشان كدة التصميم من أهم طرق تحسين محركات البحث لموقعك على الويب لأنه لازم يكون سهل في الفهم والتعامل.

من أهم العناصر اللي بتفرق في تقييم موقعك هو الوقت اللي بيقضيه المستخدم داخل موقعك. لأن كل ما كان الوقت دة قليل كل ما كان دليل على سوء جودة الموقع وفقر معلوماته.

التأكد من أن موقعك يتماشى مع الأجهزة المختلفة حاجة مهمة جدًا في تحسين محركات البحث لموقعك على الويب. بمعنى إنك لازم تتأكد أن الموقع مناسب لجميع شاشات التليفونات سواء كانت أندرويد أو IOS وكمان مناسب لجميع شاشات الكمبيوتر واللاب توب.

غير إن سرعة الموقع عامل مهم وأساسي في تقييم موقعك لأن كل ما كان بطيء في تحميل صفحاته، النقل بين الصفحات، أو حتى تحميل الصور كل ما هيأثر على عملية التقييم عند محركات البحث واللي بالتابعية هتضر موقعك في الظهور في نتائج البحث.

إختيار الكلمات المفتاحية:

الكلمات المفتاحية تعتبر أساس عمل تحسين محركات البحث حيث يعمل متخصص تحسين محركات البحث على إيجاد أكثر كلمات يبحث عنها المستخدمون في الموضوع الخاص به ليدمجوها في محتواهم بشكل منظم. ولكن كما هو متعارف عليه عادًة ما يسيء الناس فهم طريقة عمل الماكينات. فبعض الناس تعتقد إن كل ما كانت الكلمات المفتاحية متواجدة بكثرة في المحتوى المكتوب كل ما كان أداء محركات البحث أحسن وهيضمن ليهم حتمية ظهورهم في النتائج الأولية. ولكن دة طبعًا غير صحيح لأن الكلمات المفتاحية لازم تكون موجودة في أماكن مخصصة زي ال URL الخاص بالصفحة، الفقرة الرئيسية للمقال، والعناوين الفرعية كمان لازم يكون وجود الكلمات المفتاحية منطقي مش مجرد وجود بدون داعي. فيمنفعش تذكر الكلمات المفتاحية في سياق غير متماشي معاها عشان تتأكد من وجودها لعدد مرات كتير وخلاص.

وطريقة الحصول على الكلمات المفتاحية بتكون عن طريق برامج مصنعة مخصوص لمساعدتك. أشهر المواقع دي هي Google keyword، Semrush وغيرهم كتير. كل موقع بيكون له طريقة إستخدام مختلفة ولكن بيكون كل اللي عليك هو اختيار المنطقة الجغرافية للمستخدمين واختيار الموضوع والبرنامج بيعرض عليك أكتر جمل بيستخدموها الناس في بحثهم وكل كلمة بيتم البحث عنها بمعدل كام مرة في اليوم تقريبًا.

خدمة تحسين محركات البحث

ناس كتير بتعتقد إن بعد معرفة طرق تحسين محركات البحث لموقعك على الويب خلاص تقدر تتولى زمام الأمور ويقدر موقعك يكون في نتائج البحث الأولية بسهولة وبسرعة ولكن دة مش حقيقي. عشان كدة شركات كتير بتوفر خدمة تحسين محركات البحث لأن الموضوع مهما كان يبدو عليه إنه سهل ولكنه معقد جدًا في تطبيقه خاصة بسبب حجم المنافسة وزيادة عدد المواقع الإلكترونية اللي بتوصل للمليارات. عشان كدة وظيفة الـ SEO specialist أو متخصص تحسين محركات البحث هي وظيفة مهمة جدًا لازم تكون موجودة بداخل كل شركة دعاية الكترونية عشان تتأكد انهم هيوفرولك نتائج مُرضية.

نصائح لتحسين محركات البحث:

بعد ما عرفت أهم الأساسيات اللي محتاج تفهمها لتحسين محركات البحث لموقعك على الويب، لازم تعرف إن شوية تفاصيل بسيطة هتفيدك جدًا لو عملتها. وتفاصيل تانية تبان بسيطة ولكنها ممكن تدمر كل مجهودك لو عملتها. دلوقتي هنقولك على أكتر حاجات محتاج تعملها وأكتر حاجات محتاج تاخد بالك منها لتحسين محركات البحث لموقعك على الويب.

أفعل:

• لازم تختار عنوان واضح يعبر عن محتوى موقعك أو صفحتك عشان العميل يقدر يفهم أو يتوقع هو هيقرأ إيه وهل هيلاقي اللي بيدور عليه ولا لا.
• إتأكد إن عناوين الصفحات في موقعك قصيرة لأن لو كان العنوان طويل جدًا مش هتقدر محركات البحث إنها تعرضه كامل وبالتالي مش هيفهم المستخدم الصفحة بتتكلم عن إيه ومش هيجرب يزور موقعك.
• إستخدام الكلمات المفتاحية في الـ URL الخاص بالصفحة

لا تفعل:

• متستخدمش عناوين طويلة ومعقدة
• متكتبش عناوين ملهاش علاقة بمحتوى الصفحة
• متكتبش عناوين مبهمة أو مش منطقية
• متكتبش الكلمات المفتاحية في سياق مش مفهوم لمجرد انك تضمن وجودها في العنوان
  

أهمية تحسين محركات البحث:

يعتبر تحسين محركات البحث لموقعك على الويب نوع من أنواع التسويق الإلكتروني المهمة جدًا ودة لأكتر من سبب. أولهم هو إن محركات البحث بيستخدمها تقريبًا جميع مستخدمي الإنترنت على عكس مواقع التواصل الإجتماعي اللي ممكن تلاقي كتير أوي من الناس مش بيستخدموها. ميزة مهمة جدًا من مميزات تحسين محركات البحث إن المستخدمين هم اللي بيدوروا عليك مش إنت اللي بتروحلهم زي باقي انواع التسويق الإلكتروني. بمعنى إن العميل هو اللي بيدور على خدمة أو منتج موجودين عندك ودة معناه إنه محتاج المنتج دة فتقدر بإسلوب كتابتك تقنعه بيها وتخليه يقرر يشتريها. عكس التسويق على مواقع التواصل الإجتماعي واللي بتظهر فيه لمستخدمين مهتمين بالنوع دة من المنتجات ولكن مش بالضرورة يكونوا محتاجين له دلوقتي. أما الميزة الأخيرة فهي إنك بشوية إهتمام بالنقط اللي ذكرناها كلها هتقدر تطلع دايمًا في الصفحة الأولى في نتائج محركات البحث من غير ما تحتاج تدفع فلوس إعلانات زي الأنواع التانية من التسويق الإلكتروني.

إزاي أختار شركة تقدملي خدمة تحسين محركات البحث؟

شركات التسويق الإلكتروني بتزيد يوم عن يوم وأصبحت منتشرة بشكل ملحوظ جدًا بسبب أهمية المجال دة وأهمية التسويق الإلكتروني. ولكن زي أي مجال هتلاقي شركات متخصصة ومحترفة وشركات بتقدملك خدمة بجودة سيئة. هنقولك أهم حاجات تاخد بالك منها وانت بتختار شركة تقدملك خدمة تحسين محركات البحث:

• زي ما بيقولوا، ماينفعش باب النجار يكون مخلع. محتاج تشوف موقع الشركة وتعمل بحث بأكتر من كلمة عشان تعرف هم هيكونوا في النتائج الأولى ولا لا.
• التخصص دايمُا مهم، عشان كدة محتاج تعرف أكتر عن فريق العمل وتتأكد إن عندهم خبراء تحسين محركات البحث مش مجرد كاتب محتوى ومصمم مواقع وبس! كل فرد في الفريق له دور مؤثر ومهم عشان كدة مينفعش تقبل بفريق غير مكتمل يقدملك خدمة تحسين محركات البحث.
• سابقة الأعمال هي اللي بتحكم دايمًا، محتاج تشوف تقارير ونتائج من شغلهم مع عملاء تانيين عشان تقدر تاخد قرار صح.
• زي أي منتج أو خدمة، التكلفة المادية لخدمة تحسين محركات البحث بتختلف من شركة لأخرى. عشان كدة محتاج تحدد ميزانيتك وتدور على أحسن شركة في إطار الميزانية دي.

لو لسة عايز تعرف أكتر عن طرق تحسين محركات البحث لموقعك على الويب تقدر تكلم ماركتينج بالعربي عشان تقدر تفهم أكتر وتعرف معلومات أكتر عن خدمة تحسين محركات البحث وإزاي تقدر تتصدر دايمًا نتائج البحث الأولى على محركات البحث المختلفة.